البارت الخامس من جوجو، رغم الإخراج القوي والمعارك الذكية، لكنه يعاني من مشاكل جوهرية تخليه بالنسبة للبعض أضعف أجزاء السلسلة. أول شي، بطل البارت "جيورنو" يفتقد للكاريزما والتطور الواضح، ما تحس بيه كشخصية عندها حضور طاغي أو مشاعر حقيقية، وماضيه ينذكر بالبداية وينتهي بلا أي تأثير فعلي على الأحداث. تحس وكأنه موجود فقط حتى يقود الفريق للهدف بدون ما نعرف شنو يفكر أو يحس، وهذا يخلي الارتباط به شبه معدوم.
غير هذا، أغلب أعضاء فريق "باسيوني" يا يموتون بسرعة أو ما ينأخذ وقت كافي لتطويرهم، فتبقى علاقتك بيهم سطحية. حتى لو بعضهم عنده ستاندات مميزة، بس ما يصير بيهم تحول فعلي يخلي موتهم مؤثر. المعارك نفسها حلوة، بس كثرتها وتكرار فكرة "الستاند الغامض الي لازم نكتشف شلون يشتغل" صارت روتين ممل بنص البارت تقريبًا.
العدو الرئيسي "ديوفولو" يظل غامض بشكل مبالغ، مو غموض يخليك تتحمس، بل غموض يخليك تحس إن الكاتب ما يعرف شيريد يسوي بيه. ما عدنا لحظة قوية نواجهه بيها إلا بالختام، وحتى المعركة النهائية كانت فوضوية وبالصدفة تقلبت الموازين. نهاية البارت ما تعطي شعور بالإغلاق أو الانتصار العاطفي، لأن الهدف تحقق بس بدون ما تحس إن الشخصيات فعلاً مرت برحلة غيرتهم أو علمتهم شي.
بالمختصر، البارت الخامس حلو من ناحية الأسلوب والجو، بس فارغ من الداخل، ما يحتوي على العمق أو الشخصيات القوية أو الصراعات المؤثرة الي تميز باقي أجزاء جوجو.
